Artesanía

Unha ducia de produtos artesáns que se poden mercar esta fin de semana en Agolada

VINTE

Este venres comeza en Agolada Corazón de artesanía. VIII Encontro de Artesanía Tradicional e Popular de Galicia. Será durante toda a fin de semana enteira no conxunto histórico dos Pendellos, onde se facían tradicionalmente as feiras. A maior cita do sector da artesanía en Galicia reúne 66 profesionais que exporán as súas creacións e 47 empresas de alimentación artesá. Ademais haberá obradoiros, demostracións e concertos (velaquí o programa). Se aínda así non vas poder chegarte ata Agolada, fixemos unha selección de algún dos produtos alí presentes que se poden mercar desde a casa.

Este venres comeza en Agolada Corazón de artesanía. VIII Encontro de Artesanía Tradicional e Popular de Galicia. Será durante toda a fin de semana enteira no conxunto histórico dos Pendellos, onde se facían tradicionalmente as feiras. A maior cita do sector da artesanía en Galicia reúne 66 profesionais que exporán as súas creacións e 47 empresas de alimentación artesá. Ademais haberá obradoiros, demostracións e concertos (velaquí o programa). Se aínda así non vas poder chegarte ata Agolada, fixemos unha selección de algún dos produtos alí presentes que se poden mercar desde a casa.

  • 01

    Prebes variados

    Pódese mercar un rustrido? E unha vinagreta? Pois claro, e ademais de moita calidade. Esencia Atlántica é unha empresa de Muxía que comercializa prebes sen conservantes nin colorantes e cociñados lentamente. E teñen unha web moi chula onde os venden.

  • 02

    Caviar de ourizo

    O caviar de ourizo son as ovas de ourizo recollidas a man e envasadas ao natural. Conservas Gándara de Vigo ofréceas nun envase de 50 gramos e xa propoñen como degustalas: nunha torrada de pan e cun bo albariño. 

  • 03

    Zapatos feitos á man

    Non é preciso vivir en Milán ou ter varios millóns de euros na conta para poder gozar do pracer de ter uns zapatos feitos á medida. Laia Zapateiros fainos á man en Melide, de xeito artesán, e aínda que non son baratos (ten moito traballo cada zapato) son un perfecto agasallo especial para alguén especial.

  • 04

    Un morteiro de deseño

    Lorenzo Design son unha cooperativa de Santiago de Compostela que deseña e fabrica obxectos destinados á alta gastronomía e ao fogar. Este morteiro, por exemplo, está feito con madeira de faia e de cereixo, e ten un deseño ben coidado. Pódelo mercar aquí.

  • 05

    Un sacho de prata

    Se o vira a xente de antes non o crería, pero os sachos e as gadañas, ademais de apeiros de labranza, agora son broches de prata. E quedan ben bonitos. Desde Teo Ferraxe de prata tenos á venda na rede e son un perfecto agasallo rural-chic.

  • 06

    Unha boina galega 'fashion'

    Unha boina non ten porque parecer algo antigo e rancio, dándolle algúns toques pode ser algo ben moderno. Iso é o que fai Boina galega, unha marca de Santiago de Compostela que reelabora o propio concepto de boina típica para darlle un pouso de modernidade. Véndenas aquí

  • 07

    Un bolso de coiro exclusivo

    En Vigo a marca colRaxe realiza bolsos, mochilas e carteiras en coiro de altísima calidade e en edicións moi pequenas e limitadas. Este bolso vermello así o é.

  • 08

    Un torque

    Os artesáns xoieiros de A Feitura, na Coruña, fan este torque en prata de lei para usar como pulseira (tamén o teñen para o pescozo). Unha maneira de conectar co noso pasado a través da xoiería. Na súa web tes este e outros modelos á venda.

  • 09

    Uns pendentes feitos de cunchas

    O obradoiro Montse Betanzos do Grove elabora pendentes así de bonitos a partir das cunchas do mar. Fan tamén aneis, colares, pulseiras e outras cousas, pero a nós encantáronnos estes xa só polo seu nome, "Sálvora". 

  • 10

    Un bote de mel con noces

    Se a un bote de mel ecolóxico da montaña e sen filtrar lle engadimos noces, a que saberá iso? Pois delicioso, tal e como contan desde Sovoral, a empresa de Allariz. Teñen máis tipos a vender na súa web e incluso, cando é tempada, tamén teñen polen.

  • 11

    Unha hostia de café

    Xacobleas fai hostias de varios sabores e formatos que están destinadas ao consumo directo ou para utilizar en receitas que eles mesmos che amosan na súa web, onde tamén podes mercalas.

  • 12

    Un camión de madeira

    Artesanía Silvent propón desde Caldas de Reis unha serie de xoguetes feitos en madeira para os máis pequenos. Os xoguetes están realizados por un matrimonio e probados polo seu propio fillo. No caso deste camión, ademais, ofrece a posibilidade de engancharlle varios tipos de remolques e ata unha cisterna.

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.