As novas formas de consumo de música fan que convivan en popularidade artistas de todos os tempos alén do ditado da actualidade. Preguntámonos como andarían de oíntes os artistas galegos (collendo este concepto con amplitude) en Spotify e atopamos algúns resultados curiosos. Empezamos a buscar todos os que se nos ocorrían e acabamos cunha listaxe dos 100 máis escoitados. Posiblemente haxa ausencias ou despistes. Pero facémonos unha idea. 

Sabemos que hai máis plataformas e moitas máis maneiras de medir o éxito dos nosos artistas musicais, pero Spotify é a máis popular e danos claves interesantes. O dato polo que nos guiamos é o número de oíntes mensuais, que vai variando co tempo, así que o de hoxe é unha foto fixa. O primeiro que nos sorprendeu foi atopar no top 10 artistas dos 90 que coidabamos esquecidos como Amistades Peligrosas ou Cómplices, que se manteñen arredor do millón de oíntes grazas a vellos éxitos como “Me haces tanto bien” dos primeiros (42 millóns de reproducións a día de hoxe) ou “Es por ti” dos segundos (47 millóns de reproducións). 

Ver a Teo Cardalda ou Alberto Comesaña aí arriba fainos pensar que o público usuario de Spotify xa logo terá a hipoteca pagada, e ver a Marta Sánchez de número 1 e a Julio Iglesias de número 2, respectivamente, só corrobora esta intuición. Se tivésemos os datos de público por países seguramente en todos estes casos a audiencia latinoamericana terá un peso importante. O tema máis escoitado de Marta Sánchez, con diferenza, é “Colgando en tus manos”, que cantaba con Carlos Baute, coa burrada de 321 millóns de reproducións. E do fillo do doutor Iglesias Puga qué dicirmos, só ten temazos cunha media de 20 millóns de reproducións cada un. 

Tamén atopamos pola cima da lista artistas novos, e o caso do vigués Sen Senra é o máis chamativo: case un millón de oíntes mensuais, pisándolle os calcaños ao cantautor ferrolán Andrés Suárez. Séguenlle figuras do mainstream clásico de orixe galega como Luz Casal ou Carlos Jean, o triunfiño ourensán Cepeda (a moita distancia doutros participantes galegos en OT) e o rapeiro máis popular que saíu de Galicia, Hard GZ. 

Moi pegado a el, superando os máis de 600 mil oíntes mensuais, temos a Biba Dupont, o dúo galego co que falamos hai un par de anos sobre o seu éxito facendo cancións instrumentais para listas de Spotify. E nomes máis coñecidos como Iván Ferreiro, Xoel López ou Tanxugueiras, decimoquintas na listaxe que fixemos, pero primeiras se a conta fose de artistas que cantan maioritariamente en galego. 

Despois cóanse outros dous rapeiros, o compostelán Arce e o camariñán Lopes, e un cantautor, Fredi Leis, cabo de oldies but goldies como Los Suaves, Los Piratas ou Siniestro Total. Do 20 para abaixo empezan a aparecer as orquestras (El Combo Dominicano arrasa en Spotify con “La Cucaracha”), e artistas que triunfan desde hai un tempo no público máis novo como Novedades Carminha, Baiuca, dani ou Blanco Palamera (curiosamente todos vinculados ao mesmo selo musical, Raso).  Isto, falando dos 30 primeiros, que teñen máis de cen mil oíntes mensuais. De aí para abaixo, unha ampla variedade que mestura estilos e xeracións e onde tamén é curioso botar un ollo, sen ánimo de comparar. Ou con el, que para iso están estas cousas, sen tomalas nunca demasiado en serio. 

Aquí vos deixamos a listaxe o máis completa que fomos quen de facer. Puxemos o límite nos 100, o que nos deixa un tope por abaixo de 5.000 oíntes. E é a partir de aí onde seguramente atopamos as propostas máis interesantes da música galega actual, así que o mundo non acaba nos cen nin moitísimo menos. O que hai que facer é seguir aumentando en reproducións en todas as franxas de audiencia. 

ARTISTAS | OÍNTES MENSUAIS

1. Marta Sánchez | 4,9 millóns
2. Julio Iglesias | 3.1 millóns
3. Amistades Peligrosas | 1 millón
4. Andrés Suárez | 983 mil
5. Sen Senra | 929 mil
6. Luz Casal | 901 mil
7. Cómplices | 855 mil
8. Carlos Jean | 761 mil
9. Cepeda |  693 mil
10. Hard GZ | 631 mil
11. Biba Dupont | 618 mil
12. Iván Ferreiro | 474 mil
13. Arce | 445 mil
14. Xoel López | 414 mil
15. Tanxugueiras | 385 mil
16. Los Suaves | 337 mil
17. Los Piratas | 252 mil
18. Fredi Leis | 244 mil
19. Lopes | 225 mil
20. Siniestro Total | 218 mil
21. Novedades Carminha | 216 mil
22. El Combo Dominicano  | 216 mil
23. Miriam Rodríguez | 203 mil
24. Baiuca | 202 mil
25. Yoli Saa | 182 mil
26. Dani | 173 mil
27. Roi Méndez | 159 mil
28. Juan Pardo | 153 mil
29. Blanco Palamera | 121 mil
30. Luis Fercán | 91,8 mil
31. Golpes Bajos | 90 mil
32. Rodrigo Cuevas | 89,4 mil
33. Triángulo de Amor Bizarro | 82,6 mil
34. Eva B | 74,7 mil
35. Marem Ladson | 64,9 mil
36. Verto | 54,3 mil
37. Carlos Núñez  | 49,9 mil
38. Sila Lua | 43,6 mil
39. Groove Amigos | 43,3 mil
40. Luar na Lubre | 42,9 mil
41. Nico Casal | 41 mil
42. Ortiga | 40,8 mil
43. Os Resentidos | 38,8 mil
44. Aerolíneas Federales | 36,6 mil
45. Los Limones | 35,6 mil
46. Sabela | 34,4 mil
47. Andrés Do Barro | 33,5 mil
48. Dakidarría | 33,4 mil
49. Guadi Galego | 32,3 mil
50. Grande Amore | 30,9 mil
51. Orquesta Olympus | 29,4 mil
52. Sangre de Muérdago | 29,3 mil
53. Orquesta Panorama | 25,9 mil
54. Bala | 24,5 mil
55. Ganjahr Family | 22,9 mil
56. Boyanka Kostova | 22,4 mil
57. Ezetaerre | 21,2 mil
58. Heredeiros da Crus | 19,8 mil
59. Ana Kiro | 19,8 mil
60. Milladoiro | 17,6 mil
61. Néboa | 17,3 mil
62. High Paw | 16,7 mil
63. SES | 16,6 mil
64. Lamatumbá | 16,3 mil
65. Eladio y los seres queridos | 13,3 mil
66. Terbutalina | 13 mil
67. Dios Ke Te Crew | 12,8 mil
68. Fuxan os ventos | 12 mil
69. A Roda | 11,9 mil
70. París de Noia | 11,9 mil
71. Xabier Díaz | 11,8 mil
72. Escuchando Elefantes | 10,7 mil
73. Santi Araujo | 10,5 mil
74. Rumia | 10 mil
75. Lucía Pérez | 10 mil
76. Berrogüetto | 10 mil
77. Mercedes Peón | 9 mil
78. SonDaRúa | 9 mil
79. The Soul Jacket | 9 mil
80. Wöyza | 9 mil
81. Uxía | 8,4 mil
82. Amaro Ferreiro | 8,1 mil
83. Malandrómeda | 8 mil
84. Los Tamara | 7,9 mil
85. Os Diplomáticos de Monte Alto | 7,8 mil
86. Ataque Escampe | 7,6 mil
87. Treixadura | 7,6 mil
88. Esteban & Manuel | 7,2 mil
89. Berto | 6,8 mil
90. Furious Monkey House | 6,8 mil
91. Susana Seivane | 6,8 mil
92. Quempallou | 6,2 mil
93. Cora Novoa | 6 mil
94. Pili Pampín | 5,7 mil
95. Cristian Silva | 5,8 mil
96. Leilía | 5,4 mil
97. DJ Son1c | 5,3 mil
98. A banda da Loba | 5,1 mil
99. Grima | 5,1 mil
100. SkandaloGZ | 5 mil

Fe de erros: Imos ir poñendo aquí artistas que debían estar na lista, pois teñen máis de 5 mil oíntes mensuais, pero por despiste non foron incluídos de primeiras. 

• No posto 60, con 18,7 mil oíntes, debería estar Antía Muíño.