Empezamos no verán levando unha canción co seu videoclip ao festival de Eurovisión das IAs. Seguimos fedellando con DALL·E e outras ferramentas para xerar imaxes a partir de enunciados, e vimos que podiamos poñer a Godzilla na catedral de Santiago ou a Kim Kardashian coma se fose un cadro de Maruja Mallo. Ben. No último mes puxémonos a parolar co ChatGPT e descubrimos que é capaz de escribir en galego mellor ca nós. Isto en apenas seis meses. Que nos traerá o 2023?
O que xa sabemos que vai traer 2023 é a posta en marcha da AESIA, a Axencia Española para a Supervisión da Intelixencia Artificial. Un órgano dependente do Ministerio de Transporte, Mobilidade e Axenda Urbana, que decidiu que A Coruña era a sede máis idónea para supervisar as IAs, no ano no que Afundación traía á cidade a exposición AI: More Than Human, creada polo Barbican Centre e que ofrece un magnífico percorrido pola historia das intelixencias artificiais ata o día de hoxe.
Ou de antonte, máis ben, porque este mundo corre que se mata. Quen nos ía dicir hai un ano que se puñamos a descrición dunha posible imaxe que non existe nun formulario web nos devolvería un jpg con esa imaxe en poucos minutos? Quen contaba hai un mes con que puidésemos pedirlle a un chat que nos escribise unha peza de texto coas nosas ordes, e menos aínda en galego? Alguén pensaba que a finais de 2022 unha máquina ía escribir mellor en galego ca nós?
Pois todo iso está a suceder diante nosa, e coa sensación por primeira vez de que o galego está máis ou menos participando da carreira cara ao contido automático. Non nos primeiros postos, pero aí está co seu dorsal.
A primeira destas tecnoloxías que se popularizou este ano foi DALL·E –o nome mestura o pintor Dalí co robot do filme de Pixar Wall·e–, que xeraba imaxes a partir dun prompt (indicación) onde podías dar instrucións sobre o contido, a forma e o estilo. Primeiro apareceu unha versión beta só para unha primeira comunidade de desenvolvedores, pero no verán saíu a versión popular a (e un pouco máis perralleira, hai que dicilo).
Naquel momento empezamos a probar cal eran os referentes galegos que podía ter DALL·E mini.
Primeiras probas co DALL·E Mini
Mais xa de antes había artistas galegos experimentando con ferramentas similares, como Midjourney. Así facía Edu Poch, desenvolvedor web e músico (Nouvelle Cuisine, OCRE, Atrás Tigre) nas súa conta de Instagram.
E tamén empezou a aparecer algunha conta de imaxes freitas con DALL·E en relación a Galicia.
Pensabamos que rematariamos o ano así, fedellando coas imaxes e reflexionando sobre o perigo destas ferramentas para o futuro de profesións como a de debuxante ou ilustradora, cando a comezos de decembro a ameaza apareceu para as persoas que se dedican a escribir. Chegaba ChatGPT, a versión popular de GPT3, un programa que funcionaba coma os de imaxes pero con texto escrito. E ademais era multilingüe e sabía ler e escribir en galego.
Estes son os primeiros experimentos que empezamos a facer. Os galegos temos querencia por poñer a proba o que os demais saben de nós, e neste caso non ía ser diferente.
Aínda que por veces a intelixencia artificial tamén parecía rebelarse.
O cal é comprensible, porque axiña empezamos a querer pillala con problemas matemáticos.
É de agradecer a honestidade (ou o pudor) da máquina en canto ao seu pouco coñecemento da cultura galega, pero é cuestión de irlle aprendendo. Suponse que co tempo estas intelixencias artificiais van seguir adquirindo habilidades co uso, e cantas máis cousas lle digamos a este chat máis cousas nos dirá de volta. Ata que poidamos pedirlle cousas de verdade e non só polas risas. Aínda que a fronteira entre unha cousa e outra non está moi definida. Miren que avío lle fixo o ChatGPT a Os da Ría para o guion dunha gala de premios que presentaron hai pouco en Santiago.
Que nos deparará a Intelixencia Artificial dentro doutros seis meses? Funcionarán xa en galego ferramentas como Whisper para o recoñecemento da fala e a transcrición inmediata? Quitarannos o traballo a xornalistas, ilustradores, fotógrafas e creadoras de contido diverso? Ou axudarannos a facelo mellor? Acadarán un nivel de intelixencia que sirva para intimar e facernos compaña? Verémolo a mediados do 2023.
