Estreamos en exclusiva o novo traballo de Moura, Fume santo de loureiro, un EP experimental e de raizame composto como banda sonora da curtametraxe Nai. O grupo galego publicará o seu novo traballo este venres, 31, en todas as plataformas, cunha coidada edición á venda en disco compacto e vinilo.
Fume santo de loureiro foi concibido como banda sonora da curtametraxe Nai, dirixida polo cineasta Tito Refoxo, quen tamén estivo detrás do guión xunto a Brais do Rei, actual batería da banda.
Este novo EP componse de tres cancións principais, acompañadas dunha introdución e pequenos cortes de música incidental que nos presentan o perfil máis experimental da banda.
Tras o seu debut homónimo, o sinxelo "Muiñeira da Maruxaina" e o seu segundo álbum Axexan, espreitan, a banda Moura, fiel ao seu compromiso coa exploración e preservación das tradicións do país, aposta por este proxecto que conta a historia dunha familia da aldea de Rois na Coruña, que se ve involucrada nunha traxedia como é a desaparición da máis pequena da casa. A curta foi estreada na última edición do Festival de Cans. A súa protagonista, Andrea Vilariño, obtivo o premio AISGE como mellor actriz.
Trátase dun traballo escuro, onde voces e percusións tradicionais guían no proceso da perda; "esconxuros" de aires progresivos crean un mantra hipnótico ante os males de ollo; e os arrolos convértense en queixumes fantasmagóricos, segundo explican desde a discográfica.
Trátase dun traballo escuro, onde voces e percusións tradicionais guían no proceso da perda; "esconxuros" de aires progresivos crean un mantra hipnótico ante os males de ollo; e os arrolos convértense en queixumes fantasmagóricos
Gravado e mesturado en Hertzcontrol Studio de Seixas (Portugal) polo produtor e enxeñeiro Marco Lima, Fume santo de loureiro conta coa masterización de Álvaro Gallego, quen xa participou en anteriores traballos de Moura.
Fume santo de loureiro estará dispoñible desde mañá, 31 de maio, en todas as plataformas de streaming, así como en disco compacto e vinilo. Este último chega como parte das 'Trippy Series' de Spinda Records nunha edición limitada e numerada á man de 500 copias en vinilo transparente e serigrafiado nunha das súas caras. O deseño artístico é responsabilidade de Hugo Santeiro, guitarrista da banda.
Desde a produtora explican polo miúdo o significado de cada un dos temas que compoñen este EP e que axudan a comprender e interpretar mellor un son evocador e profundo.
Agoiro/Pranto
É unha balada eléctrica na que o presaxio da morte (representado pola figura mitolóxica galaica da "raposa do aire" e o cheiro a caravel) lévanos ao inevitable desenlace e o posterior "pranto" pola perda (representada na "coda" da canción mediante voces e percusións tradicionais).
Contra os males de aireada
Na cultura galaica existen múltiples xeitos para referirse ao "mal de ollo" e, segundo a súa tipoloxía, denomínase de formas diversas: ter o aire, enganido, aire de morto, mal do aire, etc. Neste "esconxuro" de aires progresivos, Moura emprega varios ensalmos combinados, froito da súa habitual procura da inspiración en estudios antropolóxicos, para crear un mantra hipnótico e curativo.
Canto de berce
Este tradicional "arrolo" foi recollido a Erminda Miramontes de Ponte Grixoa (Santiago de Compostela) polo grupo Leilía, pioneiras na recuperación e posta en valor das pandeireteiras. A banda adáptaa ao seu formato eléctrico a modo de lamento fantasmagórico.
