Igual que a gala Met converteu hai uns días un museo de Nova York nunha pasarela de moda, en Lugo o pasado sábado a Gala Sol levou á galería Solaina o traballo de dez artistas que traballan no ámbito da moda para inaugurar a exposición “Disidencias téxtiles”. Houbo mesmo alfombra vermella pola que desfilaron os convidados ao máis puro estilo do Metropolitan cun único código de vestimenta: “0% Inditex, 100% fermose”.
«Queremos confrontarnos con esta megaindustria que copias as creacións dos novos e dos consagrados artistas da moda e que incentiva que esta non sexa vista como unha arte, senón como un produto do capitalismo», explican os responsables da Solaina, Antía Carreira e Sergio Marey. Con esa declaración de intencións, a exposición“Disidencias téxtiles” descóbrenos «diferentes pezas que xogan co espazo creando instalacións onde veremos prendas e accesorios que se achegan máis á escultura que a esa moda comercial que coñecemos», din. Un xeito de dar a coñecer o talento de artistas locais que non se atopan nas grandes urbes capitais e que loitan «por amosar a arte do tecido» e por demostrar que co téxtil se poden crear pezas esculturais e que se pode «vestir arte».
Entres xs artistas participantes atopamos a Acoidan Marrero, Chema Díaz, Clandestino, Jhamiluv, MaryGarlic2000, Noumage, La Nutria López, Pre-Nudity, Sergio Marey e Sergio Vidal, para lembrar que «Galizanon é só Inditex, non somos fast-fashion, somos arte e cultura», reivindican desde A Solaina.
A maioría deles puideron estar presentes na Gala Sol do pasado sábado e desfilar pola alfombra vermella posta para a ocasión. Aquí algunha mostra dos outfits.
Gala Sol: Photocall
E aquí algunhas imaxes da mostra que estará aberta na Galería Solaina (Rúa San Roque, 50) de Lugo ata o 5 de xuño.
Gala Sol: exposición
Na exposición podemos ver a demais a nova instalación de Sergio Marey, titulada "Decreto 79/2010 " na que se denuncia a situación do galego a partir do chamado "decreto para o plurilingüísmo" aprobado nos inicios do goberno de Feijóo. Preséntase con este vídeo feito pola artista audiovisual Inma Veiga con música de Un dos Ancares.