Estreamos en exclusiva "Burato", o primeiro single do que será tamén o primeiro álbum de Peña, 'Carreiro', despois de conquistarnos con aquel EP de tres cancións titulado 'Fórmula'. A banda formada por Toño Magariños (diola, Unicornibot), Rubén Abad (Cró!, Trilitrate) e Elena Vázquez (Trilitrate) presenta neste disco un corpo de cancións exquisito, que casa sinxeleza con idiosincrasia e valentía formal. A pulsión subconsciente da musica popular amplíase para desbordar harmonías neste álbum que funciona a xeito de novo retorno, de hipnótica chamada ao fogar ulterior, tal como o definen Peña: «espazo familiar onde se proxectan imaxes da nosa infancia, aínda que nelas atopemos algúns elementos sutilmente recolocados... non todo está onde estaba».

O vídeo de 'Burato', unha canción protagonizada por órganos, voces e silencios, é de Rubén Domínguez e así o explica el: «quixen traballar sobre o refuxio e a memoria e como ambas parecen tecer alianzas e descubrir crebas. No espazo físico que constrúe a canción hai silenzos, rito e confesións; intimidade e coidados, pero tamén nubes que non parecen ser pasaxeiras, nunha atmosfera onírica. Hai unha esperanza dalgo e un consolo, mais tamén unha ameaza que se proxecta con intermitencias».

'Carreiro' publícase o 23 de abril en vinilo, CD, casete e nas plataformas dixitais, da man do selo Repetidor.