Despois de bourear co público de Madrid e Sevilla, La Melona regresa á casa para celebrar a 'Piñata!' este 2 de novembro. Unha convocatoria dobre na Sala Capitol e na Sala Malatesta na que o colectivo compostelán convoca os seus grupos orixinais para compartir escenario coas novas fichaxes. Repasamos os nomes e a xenealoxía dunha das escenas musicais máis vizosas desta década no underground galego. 

Pálida

A finais de 2013, Pálida irrompe no panorama electrónico. Apadriñado por proxectos previos como Durarará!! ou Orquesta Metamovida, o vigués José Garnelo (Nelo) achéganos un vehículo de absoluta expresividade que sabe moverse con gran precisión no directo. Traballada sempre con hardware, computadoras fóra, e producindo en vivo, a proposta de Pálida fusiona ambient techno, microhouse, noise e psicodelia en sesión intensas e hipnóticas que se complementan cun traballo de estudio de creatividade poliédrica.

Seda

Non resulta sinxelo xuntar tres sensibilidades creativas como as dos compoñentes de Seda. Estes tres amigos, unidos pola inquietude común de facer música e o cariño de anos de vivencias compartidas, únense agora neste proxecto de carácter pop. Movemento rápido, con influencias directas do hip-hop e o aprendido de grandes como Gorillaz e Panda Bear, son o fío que empregan estes vigueses para tecer a súa particular Seda.

Trifulca

Trifulca é o novo proxecto dos composteláns Carlos Gómez e Guillermo Cavero. Artistas ambiciosos formados en proxectos como Puma Pumku ou Vozzyow, deixan as guitarras de lado para mergullarse na música electrónica, o dark techno e o quarking bass. Unha proposta pouco indiferente que navega cara ritmos máis agresivos, rozando o techpunk e as texturas industriais que bordean o no wave abstracto dos oitenta.

La buena nueva

Catro novos mariñeiros e un capitán, Esteban (de Esteban & Manuel), traen esta nova proposta que chega para poñerlle o frac á música latina, xirala nunha volta aos sons máis clásicos e elegantes da salsa, merengue, cumbia e bolero. Esteban, Guillermo Cavero, Álvaro Dosil, Carlos Gómez e Fran Varela referencian a Joe Arroyo ou Héctor Lavoe, con influencias de propostas novas como Dengue Dengue, Daniel me estás matando ou Mauskovic Dance. Unha promesa coa que bailar entre onte e hoxe que obriga a vestirse para a ocasión.

Elba

Elba é o proxecto persoal da artista compostelana homónima, inspirada por figuras como Kate Bush, Enya, Madonna e bandas como Joy Division, Echo & the Bunnymen ou Jesus and Mary Chain. Sen dúbida unha posta en escena baseada na música e na estética dunha artista contemporánea de carácter vangardista. ELBA é synth pop, dark wave e dream pop, unha mistura de atmosferas vintage luminosas e sonoras que non perden a frescura do actual, nin a meticulosidade e a incandescencia que a representan.

Rayotaser

Rayotaser é o proxecto persoal de Álex Mera, iniciado tras a súa etapa en Colectivo Oruga. Xunto co produtor lisboeta Pedro Chamorra, desenvolve o seu primeiro EP Tengo que pedir perdón. La Melona achéganos este próximo novembro o seu próximo traballo Robocops, composto entre 2018 e 2019 que sen dúbida promete non deixarnos indiferentes.

Mundo Prestigio

Das cinzas de Jay chega con nova materia prima esta banda co seu segundo traballo Los Vengadores EP. A capacidade creativa de Ju, Brais, Fiz e Fer recíclase e recompón as anteriores experiencias dos vigueses, abrindo un novo camiño de formas e cores musicais. A batería, o baixo e o teclado protagonizan un directo que se matiza con samplers novidosos e un saxo que insufla un aire fresco. Unha proposta rica en matices onde se albisca moito futuro.

Piñata! celébrase este sábado 2 de novembro en Compostela. A primeira parte será na Sala Capitol ás 20:30 e a segunda na Sala Malatesta ás 00:30h. As entradas están á venda en Wegow.