A directora de Viveiro produce coa súa empresa Somadrome documentais para canles de televisión de todo o mundo. A súa especialidade son os temas de investigación científica e neste 2019 vai estrear o último, un documental sobre neurociencia: O futuro da mente.
O último documental de Ruth Chao e a súa empresa Somadrome ven en coprodución con Agallas Films e chámase Passion for the mind, ou co seu título provisional en galego O futuro da mente. Un documental que nos achega á comunicación entre o cerebro humano e a intelixencia artificial. “As neurotecnoloxías permitirán que no futuro poidamos controlar ordenadores ou robots co noso pensamento, uns avances que poden ser a solución a múltiples enfermidades”, conta Ruth coa paixón de quen está afondando nun tema que lle interesa realmente. Nos últimos anos a de Viveiro estase convertendo nunha experta que atesoura moitas horas de investigación en cuestións como o cambio climático, a colonización espacial ou a mente humana.
Ruth Chao leva nisto do audiovisual máis de 15 anos, pero o seu é un caso que non abunda no país: produce documentais en Galicia, pero á súa vez, non forma parte do audiovisual galego tal e como pensamos habitualmente nel, xa que está bastante desconectada. Os seus clientes están lonxe, moi lonxe, e no seu coworking de Santiago de Compostela xa están afeitos a oíla falando en inglés por skype.
Ruth empezou traballando na antiga TV Siete (hoxe Setemedia) facendo a produción de programas como o Cazador de palabras ou documentais como Radiografía dun autor de tebeos, pero xa desde moi pronto tivo o anhelo de intentar facer outras cousas. Licenciada en Comunicación Audiovisual pola Universidade Complutense de Madrid, e con varios mestrados posteriores en produción e ventas internacionais, desde o primeiro momento viu unha posibilidade de negocio en ir máis alá do mercado galego e español.
2050 How soon is now? foi o seu debut na dirección. Un documental do 2006 no que se metía na cuestión do cambio climático, cando non era un tema tan coñecido, nin tan tratado na prensa xeneralista. “Non se sabía case nada daquela, foi alucinante ir descubríndoo todo”, relata ela. A peza, gravada en inglés (ao igual que todos os seus documentais), contaba coa participación dos máis eminentes científicos relacionados co tema no mundo, e era un exemplo dun magnífico traballo de produción feito pola propia Ruth Chao. Foi Premio Mestre Mateo ao mellor documental ese ano.
Curiosamente, ao pouco de estrear 2050 How soon is now? apareceu un documental do mesmo tema e cun enfoque moi parecido. Era Unha verdade incómoda, o documental de Al Gore sobre o cambio climático. Ruth, non obstante, cre que, o que en principio podería ser un problema, acabou proxectando aínda máis no mercado exterior a obra.
Coa súa empresa Somadrome, Ruth Chao leva xa 5 anos producindo documentais. Sempre foron de corte científico, e sempre os vendeu en canles internacionais. “Montar Somadrome e facer este tipo de documentais non foi algo premeditado. Foi xurdindo pouco a pouco. Simplemente se trata de cuestións que me apaixonan”. Esa maneira de facer, deixándose guiar pola paixón e pola intuición, acabou levando as súas producións a canles de países tan distintos como EEUU, Italia, Reino Unido, Corea do Sur ou Rusia. Pero como sucede sempre nos casos de éxito, ademais da paixón hai unha estratexia: “Cando escollo un tema sobre o que empezo a investigar ten que ser algo que interese por igual en Tokio, Montreal e Santiago, por exemplo”.
The Climate Blueprint en 2014 foi o primeiro de Somadrome. Seguía dalgún modo a estela deixada por 2050 How soon is now?, e abordaba o inminente cumio sobre o cambio climático de París en 2015 e as decisións que debían tomar os países para reducir o quecemento global. “Prodúceme un medo atroz pensar no cambio climático, en todo o que está sucedendo e as consecuencias que vai ter para as vindeiras xeracións”.
A peza estivo presente no Festival International du Film d'Environnement de París, no Ecocup Festival de Moscova, e no FReDD de Toulousse, en Francia. Ademais emitiuse en Al Jazeera Qatar, na KBS de Corea do Sur, en Servus TV de Austria, en TVP de Polonia, e en UR-SVT de Suecia. O camiño estaba aberto, e a partir de aquí virían moitas máis. Red Ice, do 2015, volveu afondar na cuestión cimática.
“Os seres humanos merecemos seguir como especie porque a pesar de todo o que estamos facendo mal somos o máis marabilloso do universo, ou polo menos, do que coñecemos ata o de agora”. Nesta busca para dar cunha maneira que nos permita continuar como civilización, Ruth atopou en 2017 a idea para o seu seguinte proxecto. Space Colonies é unha serie documental de 3 episodios onde se aborda a posibilidade de establecer colonias humanas permanentes noutros planetas ou no propio espazo exterior. “É o meu proxecto favorito xa que é a esperanza da nosa especie, para que poidamos continuar”, relata Ruth.
Algúns dos documentais de Somadrome, ademais de nas canles internacionais, tamén se poden ver en España en TVE e Odisea. O último, O futuro da mente, que pode chegar para este verán, poderase ver en Movistar e tamén na Televisión de Galicia, xa que conta coa participación da propia canle.
