Seguro que xa sabes que este mes de maio ten dúas grandes eleccións europeas. O próximo 26 de maio escolleremos aos nosos representantes no Parlamento Europeo, como veñen contando os compañeiros de Praza Pública, mais este sábado 18 de maio tamén escolleremos outra cousa importante a nivel europeo: a gañadora do Festival de Eurovisión 2019.
Un ano de eurodramas mil, especialmente políticos
Trala vitoria de Netta o ano pasado en Lisboa co seu "Toy", o evento musical máis seguido do globo aterra este ano en Israel, non exento de eurodramas e polémicas, especialmente políticas, debido ao conflito armado que Israel mantén con Palestina. Xa desde que o país se coroou en 2018 coa vitoria, moitas foron as voces que chamaron a un boicot á celebración do festival nun país condenado por violar os dereitos humanos, matando civís e mantendo un apartheid en territorio palestino. A polémica foi medrando a medida que a edición 2019 se achegaba: o goberno e a KAN (a televisión pública de Israel) quixeron establecer como sede para o festival á cidade de Xerusalén, moitos dos concursantes foron chamados a facer boicot ao certame e non asistir a Tel Aviv, celebráronse manifestacións contra o festival en moitas cidades europeas e mesmo nesta última semana a KAN foi vítima de ciberataques durante a emisión das semifinais.
Por se isto fose pouco, moitos dos países queixáronse tralos primeiros ensaios da pésima realización por parte da organización do festival e da televisión israelí. No canto de seguir o plan de cada país para executar toda a escenografía e os planos que tiñan preparados para cadansúa actuación, a KAN alegaba motivos técnicos para inserir planos xerais do espazo e outros movementos de cámara que facían que a actuación non saíse tal e como foi pensada polas distintas delegacións. Malta e Portugal foron algúns dos países máis perxudicados por este asunto, que tamén foi comentado polos eurofans en Twitter nos últimos días.
E España que?, estaredes pensando. Pois aínda que pareza raro, este ano os eurodramas da candidatura española foron practicamente inexistentes, salvo a polémica co reparto pouco equitativo de cancións na preselección de Operación Triunfo. Por vez primeira en tempo, España preparou moito máis a actuación de Miki, gústenos ou non a canción escollida. Para iso a delegación española contou coa "axuda" do coreógrafo Fokas Evangelinos, que gañou en dúas edicións o festival: Rusia en 2008 con Dima Bilan e en 2005 con Helena Paparizou, e tamén con Mamen Márquez, profesora de técnica vocal de OT.
Unha edición case de participación récord
Malia os eurodramas e boicots, Eurovisión 2019 queda tan só a dous países de igualar o récord de delegacións participantes, establecido en 43 nos anos 2008, 2011 e 2018. A 🇧🇦 Bosnia e Herzegovina e a 🇸🇰 Eslovaquia non lles foi permitido competir este ano como sanción pola débeda que teñen coa UER, a entidade organizadora do festival. 🇧🇬 Bulgaria confirmou inicialmente a súa participación, pero no mes de outubro disolveu a súa delegación e anunciou a súa retirada alegando problemas económicos. 🇹🇷A histórica Turquía, pola súa banda, manifestou a través do director xeral da súa televisión pública a súa negativa a voltar ao formato televisivo porque na súa canle “non poden emitir” en horario infantil a alguén coma Conchita Wurst "con saia, que non cre nos xéneros e que se considera home e muller á vez”. Ademais, por diversos motivos, tres dos países máis pequenos do continente como 🇱🇺 Luxemburgo, 🇦🇩 Andorra e 🇲🇨 Mónaco non teñen previsto a súa volta ao festival.
As principais favoritas, en tres hashtags
🇸🇪 Suecia
#Gospel #Retrouso #BrilliBrilli
🇦🇺 Australia
#Ópera #Fantasía #Voadora
🇳🇱 Holanda
#Balada #Piano #Minimalismo
As máis petardas, en tres hashtags
🇨🇾 Chipre
#Fuego #Latex #ReplayReplayReplay
🇨🇭 Suíza
#Baile #Hermo #Brazacos
🇸🇲 San Marino
#NaNaNa #LaCasaAzul #Disco
As que tes que ver, si ou si, en tres hashtags
🇫🇷 Francia
#Queer #Liberdade #BrilliBrilli
🇮🇸 Islandia
#BDSM #WTF #Anticapitalismo
🇮🇹 Italia
#ConflitoFamiliar #Trap #Buenocho
As grandes ausentes
🇺🇦 Ucraína
Faltaba un eurodrama. Maruv, a representante escollida polos ucraínos para representalos en Eurovisión 2019, foi vetada pola televisión pública pola súa relación con Rusia, país co que Ucraína está en conflito pola anexión de Crimea. A delegación ucraína tentou tirar doutros finalistas da preselección para salvar a súa participación no festival, pero todos rexeitaron a oferta do ente público para substituír á cantante, causando baixa nas semifinais de Eurovisión 2019. Así e todo, "Siren Song" conseguiu un gran apoio por parte dos eurofans europeos, que mesmo a sitúan coma unha das favoritas deste ano mesmo sen estar presente en Tel Aviv.
🇵🇹 Portugal
O martes todas estabamos pegados ás nosas pantallas para seguir a primeira semifinal e apoiar aos nosos veciños portugueses… Pero non puido ser. Conan Osiris e o seu "Telemóveis", do que xa vos falamos en VINTE, non conseguiron gañar o favor do xurado e do público europeo nin cunhas pintas ao estilo Rosalía nin coas súas coreografías imposibles. Unha auténtica mágoa!
🇵🇱 Polonia
O que nos gusta a nós unha boa canción folk en Eurovisión! A proposta das polacas Tulia ben podería pasar por unha canción das Tanxugueiras, das Leilía ou das Ialma, pero con vestidos rococó que parecían sacados de Star Wars. É unha magoa que non conseguisen facerse cun posto na final, pero igual Gayoso lles pode facer un oco unha noite de venres no Luar.
A final, o sábado 18 ás 21h.
Lembra, aínda estás a tempo de non perder a gran final do Festival de Eurovisión 2019 este sábado ás 21h, que poderás ver na 1 de TVE (mellor co audio en versión orixinal) ou na túa páxina web de streaming de confianza (YouTube mesmo, co extra de ver todo o que pasa nos intermedios). Let the Eurovision Song Contest… begin!
