Lúa Mosquetera traslada o poema "O enterro da sardiña" do libro Espíderman, que sairá publicado pola editorial Galaxia nas vindeiras semanas, e dálle vida ás imaxes e sons que apuntan os seus versos –que son lembranzas do seu dó– coas músicas de Pablo Seijas e as pandereteiras Lilaina, protagonizado pola súa irmá Zeltia Mosquera e baixo a dirección de Bastian Rodríguez. 

A poeta de Miño (A Coruña) gañou con "Anorak de pel de caribú" a última edición do premio aRi[t]mar de poesía, practica a slam poetry e ten participado en antoloxías de poesía nova. Ademais, autoeditouse co poemario Aunque seas rara y seas pájaro.

«Gústame falar sen cancelas. Imaxino que haberá xente que bote en falta certa calidade literaria nos meus textos só porque non son pretensiosos. Non podo versar sobre o amor verdadeiro, sobre o medo á morte ou sobre as dúbidas existencialistas, porque non creo en ningún deses temas», contou nunha entrevista en VINTE.