'Non me esquenzas' é o primeiro single de 'PM', o disco longo que Grampoder presentarán a finais desta semana. A banda compostelá, formada por LeRoi e Martin Wu, edita o traballo despois dunha prolongada ausencia discográfica de preto de oito anos, cunha versión máis eléctrica, máis enerxética, máis negra do seu rock portátil. 

As tripas dunha casa abandonada e as rúas e edificios maltratados polo tempo dunha localidade despoboada como Canabal (Sober) ilustran a letra desesperanzada de 'Non me esquenzas'. O videoclip foi gravado por Natalia Sequeiro e Roi Fernández, coa colaboración de Roberto Burés como actor principal.