Escoitar e deixarse levar pola escoita. “E se queres” constitúe un convite a gozar da escoita, amodiño, dunha música que aloumiña os ouvidos. A canción de apertura do novo disco de Faia, reivindica a importancia do corpo e do pracer, do contacto co íntimo e coa natureza. A peza é unha adaptación dun arrolo tradicional, “Durme meu filliño”, do arquivo de Alan Lomax en Soutoxuste, onde se experimenta coa sonoridade da gravación de campo, coa repetición e coa calidez da voz. 

“E se queres” é o primeiro petisco de Alvela, un álbum que transita paseniño pola experiencia da maternidade, pola memoria do corpo e as violencias que o atravesan, mais tamén sobre a forza que reside no íntimo, no desexo e no pracer. 

Faia Díaz Novo é cantante, creadora e historiadora da arte. Compaxina a súa carreira musical en solitario coa participación en grupos como De Vacas, o Coro Encaixe e o trío Nacho.Faia.Lar. No 2018 publicou o seu primeiro disco en solitario, Ao cabo leirín, unha autoedición en vinilo centrada no cancioneiro tradicional e reinterpretado en clave feminista e contemporánea. Este 23 abril presentará Alvela, o seu segundo traballo, cun concerto no Teatro Principal de Santiago.