A quen non lle vai agradar unha louvanza? Unha palabra cariñosa? Un recoñecemento? Pero o certo é que hai xente que se adica a isto, non que cobre por opinar senón que vive de facer crítica. E a estas persoas é moito máis difícil, polo tanto significativo, arrincarlles palabras boas. As malas non, esas téñenas sempre a man e en pista de despegue. Por iso cando os astros se conxuran e un deles fai o esforzo sobrehumano de rir durante unha comedia, hai que enmarcalo. Isto mesmo fixo a guionista Araceli Gonda cunha das críticas de 'Cuñados', agora con 16 candidaturas aos Mestre Mateo.

A poesía é só sentimentalismo? Tamara Andrés, poeta e tradutora, autora de obras como Irmá paxaro (Cuarto de inverno) ou Distancias (Galaxia) xunto a Marcos Viso, detesta que se peche o universo poético a algo como os sentimentos. Con ela parolamos de xornalismo cultural, de intelectualizar contidos que non o son e abrimos o melón da tradución.