"Buah!". Novo tema e vídeo de Cró!

mércores 1, setembro 2021

Cró!, a banda saída do colectivo Metamovida, lanza 1 de setembro un novo sinxelo, "Buah!", o primeiro tema do que será o 6º album dos vigueses, que tras máis de 10 anos xuntos seguen a experimentar as posibilidades do rock. A canción fai parte do recompilatorio 'Grados. Minutos. Segundos' no que o selo gaditano Spinda Records fai unha viaxe sonora que conecta 24 bandas españolas en plena efervescencia (e do que xa presentamos a "Muiñeira da Maruxaina" de Moura).

Tal como explican os propios Cró!, «'Buah é unha palabra utilizada para expresar asombroso, unha especie de WTF curto. "Buah!" describe unha viaxe de risa psicodélica durante unha (quizais varias?) noites con diferentes paradas e sentires que se axustan á música e viceversa. Representa bastante ben o momento da banda onde as múltiples influencias aparecen por todas partes apoiando a propia creatividade da banda; todo parece posible dende a clásica ou electrónica ata o Forest Doom ou a Risa Construtiva. Todo isto podería resumirse dicindo: "Buah, qué movida neno!"».

O vindeiro 11 de setembro presentan en directo este novo single en vinilo no REVOLTALLO XXVIII.

Créditos

Música: Cró! (Rubén Abad, Xavier Bertolo, Cibrán Rey, David Santos)

Tema gravado, mesturado e masterizado por Pablo Iglesias en Radar Estudios (Vigo)

Video e visuais: Borja Bernárdez

Producidio por Producciones Infames

Gravado no Teatro Albeitar (León)

Tamén che interesa

Muiñeira da Maruxaina, o novo videoclip de Moura

O selo andaluz Spinda Records está a piques de lanzar unha caixa recompilatoria titulada 'Grados. Minutos. Segundos.' que durante o vindeiro ano publicará 12 vinilos de 7' con temas inéditos de 24 bandas que representan o underground das micro-escenas que máis ferven en distintos territorios do Estado. Teñen en común seren bandas «que rachan co establecido e/ou van contra as modas e tendencias do mercado» e unha das participacións galegas é a de Moura, a banda que sorprendeu o ano pasado co seu primeiro álbum que mesturando psicodelia e rock progresivo co folk tradicional galego. O primeiro deste recompilatorio lanzouse esta semana con este videoclip da "Muiñeira da Maruxaina" gravado nos estudios Mans da Coruña.
'Póutega'. Estreamos o novo videoclip de Trilitrate

Os vigueses Trilitrate andan a presentar o seu novo disco, Está de grelo, e hoxe estrean con VINTE o vídeo dunha das súas cancións, Póutega, composición de Pablo Rivero, quen colabora tamén poñendo a voz. «Na súa orixe ía ser instrumental e Pablo engadiulle esta extraordinaria e sombriza letra máis tarde. Pasar da guitarra ao oud e a idea do arranxo instrumental foi probablemente a faísca que prendeu a mecha da nosa creatividade para pechar a peza», explican. «Póutega é o nome galego da Cytinus Hypocistis, unha planta parasita da contorna mediterránea que xera pequenas floriñas. Que incrible sorte temos de poder facer cousas así cun coloso como Pablo!»
'Burato'. Estreamos en exclusiva o novo single de Peña

Estreamos en exclusiva "Burato", o primeiro single do que será tamén o primeiro álbum de Peña, 'Carreiro', despois de conquistarnos con aquel EP de tres cancións titulado 'Fórmula'. A banda formada por Toño Magariños (diola, Unicornibot), Rubén Abad (Cró!, Trilitrate) e Elena Vázquez (Trilitrate) presenta neste disco un corpo de cancións exquisito, que casa sinxeleza con idiosincrasia e valentía formal. O vídeo de 'Burato' é de Rubén Domínguez e o disco 'Carreiro' publícase o 23 de abril.