"O temor ao que nos enfrontamos é unha ficción. As noticias din que non estamos asegurados. Que non hai blindaxe que suavice o de estar acompañados". Así empeza Ninja, o primeiro single extraído do LP Demo, no que Malraio presenta oito cancións en galego que camiñan entre o pop pantanoso e post hardcore. Trátase do primeiro LP desta banda formada por catro músicos coñecidos da escena compostelá. Conquistáronnos xa co seu EP Prótese (Estudios A Ponte, 2017), e sobre todo co seu potente directo. Hai uns meses estivemos almorzando con Malraio e con Deleite mentres a banda ensaiaba os temas do disco nos Estudos Potemkin de Compostela.