Outro ano máis os Premios da Música Martín Códax xuntaron en Pontevedra toda a industria musical galega. Alí estivemos e contámosvos o que pasou, se é que non o vistes en streaming na súa web ou se queredes facer spoilers aos amigos que queiran vela sen saber como foi (emitirase este sábado 11 de maio ás 22:45 na TVG2 e o domingo a media noite na TVG).

A gala

Para empezar hai que falar da gala. Non é preciso gastar moitos cartos nin facer moito artificio para facer unha boa gala, simplemente cómpre poñela en boas mans. Neste caso foi Quico Cadaval na dirección artística e Pablo Castaño na musical. A presentación correu a cargo de Lucía Aldao e María Lado, a escenografía foi de Ana Seoane, as acrobacias de Mercé Solé e Raquel Oitavén e houbo colaboracións especiais de Sergio Tannus e Mónica de Nut. E tamén un septeto de jazz que facía a música en directo. Entre todos fixeron un percorrido pola historia da música galega. Pequenos monólogos de Cadaval, reinterpretacións de temas clásicos galegos e as presentacións sempre cómicas de Aldaolado foron sucedéndose entre lotes de premios entregados.

Quico Cadaval pediu que a xente non se enlease de máis agradecendo os premios e máis ou menos foise cumprindo, e por iso tivo ritmo. Case que o fixo todo o mundo excepto Sonia Lebedynski, a presidenta da asociación Músicas ao vivo, que fixo ao final un discurso moi longo. Parecía que en calquera momento ía saír o amigo Cadaval a berrarlle por estenderse de máis. Pero o certo é que o que dixo precisaba tempo. Lebedynski falou de temas tan importantes como as consecuencias negativas da nova Lei de Espectáculos sobre a musica nas vilas e cidades, da importancia de crear referentes femininos na industria musical (e non só músicas), da difusión necesaria da música galega nos medios de comunicación públicos (toda a directiva levaba a camiseta de "Defende a galega") ou da programación das salas e festivais do país, ás que lle pediu un esforzo por programar música galega. 

Para os que non fomos a outras edicións a gala foi toda unha sorpresa. E lembremos algo, esta era só a sexta vez que se facía, así que ten moito mérito chegar a este nivel en tan pouco tempo. Parabéns a Musicas ao vivo e a toda a organización.

As categorías

Ademais das que xa hai, botamos de menos catro: grupo ou artista revelación, canción do ano, disco do ano e mellor directo. Estas poderían ir a maiores e mira ti, sempre dan lustre, que o glamour tamén é importante nestas cousas. Deixámolo como suxestión, pero imaxinade por un momento o titular: “Los Tamara grandes vencedores dos Premios da Música cos premios a mellor canción, disco e directo” (poñemos Los Tamara para non levantar suspicacias). 

Os premios

A rumoroloxía previa xa prognosticaba algúns premios e non errou. Baiuca en electrónica, Nao en metal ou Su Garrido Pombo en canción de autora semellaba que tiñan moitas posibilidades. Realmente todos os nomeados merecían o premio porque chegar ata aí xa é un gran paso. Hai que recordar que os nomeados vótanos os propios compañeiros e compañeiras de Musicas ao vivo, e sobre eses nomeados decide o xurado. Como amantes dos losers que somos, acordámonos moito dos que non gañaron, especialmente dalgún en concreto. No premio de Espazos de Comunicación Musical destacamos o proxecto de Laura Romero Musicas galegas ilustradas, que está facendo máis pola visibilización da muller na música que calquera campaña institucional. En Salas estaba A Arca de Noe, un proxecto que merece toda a nosa atención polo difícil que é crear e manter unha programación cultural no medio do rural galego. E tamén nos acordamos de Cabodano en metal porque teñen o mellor nome de banda de metal do mundo (quen non foi nunca a un cabodano?).

As ausencias

A democracia é o que ten e cando a cousa é por votación hai que aceptala. Con todo hai algunhas ausencias entre os nomeados das que queremos acordarnos. Chicharrón en pop, Mileth en metal, Thee Blind Crows en rock, Sangre de Muérdago en autor ou o Arteficial en festivais, son algunhas moi destacables. Isto debe servir para darlle máis valor aínda aos premios e ver a dificultade que ten só o feito de estar nomeado, cando proxectos tan bos coma estes non o deron conseguido. 

Tres momentos da gala

Escoller vinte sería moito, así que quedamos con tres.

1. A crooner Lucía Aldao:  Interpretou “Chámame”, unha versión en galego do “Call me” popularizada por Petula Clark, que xa cantaba Jacinta no ano 67. Moi ben, porque non era fácil e con esa banda de musicazos detrás calquera se poñería nerviosa. Aldao non. Ben por Aldao. O tema que cantou era este: 

2. Momento Alan Lomax:  Quico Cadaval facendo de Alan Lomax mentres grava unha aborixe galega interpretada por Mónica de Nut. Mirade a gala aínda que só sexa por este pequeno sketch.

3. Premio Honorífico a Carlos Barruso: Momento moi emocionante o de Carlos Barruso. Por enriba do músico e o profesor vimos á persoa. Cando saíu a recollelo contou moi sereno que lle fora diagnosticado un cancro terminal e que estaba vivindo os últimos meses que lle quedaban, pero que botando a vista atrás se sentía moi afortunado por ter vivido unha vida tan marabillosa. Toda unha lección de dignidade e elegancia a que vimos sobre o escenario. Moi ben tamén por parte da asociación homenaxear en vida á xente que o merece. Como deixou escrito o Ben Cho Sei “Quedan suprimidas tódalas homenaxes postmortem porque as cousas ou se fan ao seu tempo ou non se fan”. Pois iso.

En resumo

Foi unha boa gala a do Pazo de Cultura da cidade do Lérez (grazas ao concello de Pontevedra, que estivo outra vez apoiando o que hai que apoiar). Houbo un patrocinador involucrado, Martín Códax, e uns pinchos finais que foron tamén unha celebración da nosa gastronomía (gran logro dos organizadores conseguir todo iso). En xeral podemos dicir que foi unha noite para festexar a música galega e poñer de manifesto os excelentes profesionais que ten o sector. Repetiremos o ano que ven.

PREMIADOS POR CATEGORÍAS:

POP/iNDIE Igloo

ROCK Bala

METAL Nao

JAZZ/MÚSICAS IMPROVISADAS Xosé Miguélez - ONTOLOGY

MÚSICAS URBANAS Wöyza

CLÁSICA/CONTEMPORÁNEA Adrián Saavedra

MÚSICA TRADICIONAL E FOLQUE Tanxugueiras

MÚSICAS DO MUNDO Marcos Teira - NÓS

MÚSICA INFANTIL Xoán Curiel e A Banda do Verán – A CASA DO TERROR

MÚSICA ELECTRÓNICA Baiuca

REGGAE/SKA/MESTIZAXE Banda Crebinsky

ORQUESTRAS/GRUPOS/MÚSICA DE VERBENA Orquestra Los Satélites

BLUES/FUNK/SOUL Carmen Rey

CANCIÓN DE AUTOR/A Su Garrido Pombo

COROS E GRUPOS VOCAIS Ejazz

ORGANISTRUM FESTIVAIS Festival de Pardiñas

ORGANISTRUM SALAS El Contrabajo Club

ORGANISTRUM ESPAZOS DE COMUNICACIÓN MUSICAL Diario Cultural

PREMIO HONORÍFICO MÚSICAS AO VIVO 2019 Carlos Barruso

A gala emitirase este sábado 11 de maio ás 22:45 na TVG2 e o domingo 12 a media noite na TVG. Se non sodes quen de agardar aquí tedes un pequeno resumo que fixo o Canal Rías Baixas.