Vinte de vacacións. Propomos 20 contidos para lermos (e vermos) en agosto

Chega agosto e Vinte marcha de vacacións. Nas próximas semanas non actualizaremos a revista por descanso (merecido) do persoal. Atá entón, deixamos por aquí unha cumprida escolma de artigos para lerdes ou verdes nestes días de agosto: reportaxes, música, entrevistas con e sen vídeo ou podcasts, hai un pouco de todo. Volvemos en setembro con todas as ganas para seguir a contar a Galicia dos anos 20. Que teñades moi bo verán!

Alexandre López, adestrador e educador canino “Cómpre entender os cans, a personalidade e carácter de cada individuo”

Educación fronte a castigo. Alexandre López Campos é adestrador e educador canino. Entusiasta do seu traballo, asegura que moitas veces as persoas están moi centradas no foco do problema –o can bótase ás bicis, ladra, morde…- mais non pensan nas causas. E, con frecuencia, só se trata de reaxustar condutas. Para iso formula programas educativos onde analiza aspectos como se están ben cubertas todas as necesidades básicas do can. “Por exemplo, un border collie adoita necesitar entre seis e sete horas de desgaste físico, aínda que depende de cada individuo”, asegura. Se non se cumpre ese tipo de necesidade básica, xa podemos saber unha causa de comportamento inadecuado. 

VINTE na rúa

Coa colaboración de

Vinte almorzando con Vero Boquete

Hai tempo que Vero Boquete é referente. Éo no campo e fóra. Con 20 anos como futbolista profesional e un estadio co seu nome na súa terra (Compostela) foi a primeira futbolista española en gañar unha Champions e a primeira muller comentarista dunha Eurocopa masculina, en 2024 con TVE. A que fora capitana da selección española segue en activo en Italia e estes días comenta os partidos da selección española feminina na Eurocopa de Suíza. 

Almorzamos e conversamos coa crack galega sobre os seus comezos, a “soidade e morriña” na vida dunha futbolista profesional ou o seu futuro como adestradora co obxectivo de chegar “ao máximo nivel”. 

Sobre a súa prematura saída da selección, Boquete ten claro que é sabido que non foi por motivos deportivos. “Pagamos as consecuencias da nosa revolta, pero sen esa loita que fixemos en 2015 os resultados do fútbol feminino de agora non sería posibles”, defende.

VINTE almorzando con Deleite

Coa colaboración de

Entrevista | Sheila Patricia: “Non paro para criar, senón para reflexionar”

"Creo que o ser humano se está a afastar do que é propio". Sheila Patricia, cantante, compositora, pandeireteira, bailarina... dixo "basta". A artista anunciou recentemente unha pausa para pensar, tomar aire e reflexionar tranquilamente sobre o seu camiño. Na súa carreira, de máis de 20 anos, nunca parara, mais agora, cunha pequena de pouco máis dun ano, está a comprobar a voracidade dunha sociedade que che "obriga a producir" e especialmente na industria discográfica, moi esixente de seu. 

"Este sistema non está afeito para que unha nai poida soster semellante proxecto desde a independencia. Entón a parada é para dar un golpe na mesa e dicir, oes, aquí isto é moi bonito pero a conciliación é unha cousa que non existe e tamén para reflexionar eu internamente e dicir: como quero que sexa esta Sheila Patricia?", explica a artista. A parada chegará dentro dun ano pero ata entón presentará un novo disco de "despedida" e poderemos vela de xira. Este mércores, día 30, actuará, con toda a súa banda, no parque de Galeras de Compostela.

Vinte en Vilagarcía Onde a xente se coñece e (aínda) saúda pola rúa

‘Vinte na vila’ regresa por todo o alto con Vilagarcía. Unha cidade onde a xente chega para quedar a vivir e a veciñanza dá a benvida. Grazas ao apoio de Caixa Rural Galega, percorremos Vilagarcía e descubrimos o fervedoiro que é o mercado aos martes e sábados, a historia moi presente da súa fundación, coa unión de Carril, Vilaxoán e Vilagarcía; coñecemos tamén a Ángel, o do Carrito, co seu histórico quiosco no centro e admiramos Cortegada, a illa recuperada polo pobo de Vilagarcía, que hoxe pertence ao parque nacional Illas Atlánticas. Nesta singradura manexan o temón a escritora Montse Fajardo e o actor Carlos Blanco, expertos cicerones para amosar a vila de García.

VINTE na vila

Coa colaboración de

Habitar o baleiro. "Prefiro ver as estrelas"

“Estamos a documentar os últimos folgos dun modo de vida. Unha civilización que se extingue”. Pecorremos con Brais Lorenzo, fotógrafo e autor das imaxes que compoñen “Habitar o baleiro, unha exposición que busca deixar testemuño do que está a acontecer no interior de Galicia, nas montañas de Lugo e Ourense e espertar conciencias. En realidade, trátase dun ambicioso proxecto audiovisual, que na actualidade abrangue textos, reportaxes e audios de conversas con persoas do lugar e prevé tamén un documental para o que teñen en marcha unha campaña de crowfunding. 

O fotoxornalista ourensán defende que “non hai cuestión máis relevante actualmente na Galicia para documentar” que o que está a acontecer neste rural, onde habitan persoas a desenvolver unha sorte de “loita romántica”. 

Fotografía

Exército Mekemeke. Destripando a dobraxe con Antón Rubal

Sempre é un auténtico pracer escoitar de novo a voz de Antón Rubal a través dos micros do mekerocho. Regresa un dos primeiros mekemekes que pasou polo programa para repasarmos a súa carreira como actor e director de dobraxe. 

Ademais, poñémolo a proba para ver se é capaz de recoñecer a personaxes míticos da xabaxeración aos cales el lle puxo voz.

Exército Mekemeke

Vinte na rúa, con Uxío García, polbeiro e ilustrador. «Quero ser autor de cómics, pero o polbo non me desgusta»

Sempre lle gustou debuxar e facíao mentres na pota fervía o polbo. Uxío García Lage (O Carballiño, 2000) leva na súa historia a tradición polbeira das terras de Oseira e a faceta artística dos seus pais, ambos os dous actores profesionais. 

Vén de rematar a súa formación en Banda Deseñada en Pontevedra e quere ser autor de cómics, pero recoñece que ir ás feiras, preparar e vender o polbo como os seus avós tamén lle chista. 

VINTE na rúa

Coa colaboración de

Vinte almorzando con Mondra

"Non teño o recordo de querer ser outra cousa". Almorzamos e parolamos co cantante, compositor e bailarín Mondra, que vén de publicar o seu segundo disco "De Ronda". O artista reflexiona sobre o rápido que está a acontecer todo na súa carreira musical, a conexión tan boa e tan forte que os seus temas acadaron co público e o novo reto que supuxo este álbum, feito da man do Hevi. Un traballo onde segue a dialogar coa tradición oral galega, pero dun xeito máis orgánico e prescindindo da electrónica. 

Mondra fala das súas referentes, as mulleres que escoitaba cantar de pequeno como Sés ou Guadi Galego, e do reto que supón achegar o seu traballo ao público como el quere e non como mandan as redes sociais, que nos teñen a todos "escravizados".

VINTE almorzando con Deleite

Coa colaboración de

Vinte preguntas. Presentamos o gran trivial da cultura pop-ular galega

Que fobia lle dá nome a un grupo de rock de Boiro? Cal é a discoteca máis antiga de Galicia aínda en funcionamento? En que rede social se deu a coñecer Páramo Pictures? Quen deseñou o logo do Xacobeo 2021-2022?  Estas son algunhas das vinte preguntas que podes atopar en cada partida que botes do xogo que presentamos hoxe. 

VINTE

Co apoio da

Máis vinte

  • Exército Mekemeke. Consultorio mekemeke

    Os mekemekes poñemos a furrular a nosa sabedoría para dar solución a todos os problemas dos mekemekes que acuden a nós. 

    Non podíamos rematar esta tempada especial sen un consultorio a máis puro estilo mekemeke con respostas que non solucionan absolutamente nada nin consellos que leven por bo camiño. 

    Exército Mekemeke

  • Vinte no Asalto ao Castelo. Feirantes, en Vimianzo

    “A realidade é que agora traballo moito máis do que traballaba como asalariada e gaño menos, pero son máis feliz”. Raquel Barreiro traballa co coiro e grava con láser. É unha artesá, que vai polas feiras vendendo cousas fermosas que fai ela mesma.  José Del Castillo leva tres anos nos mercados. “Tiven outras aventuras de vida, pero esta chamábame hai tempo. Precisei dunha crise persoal, dunha ruptura, para dar ese paso e mudar de vida”, asegura. 

     

    Neste Vinte na rúa estival, achegámonos ao Asalto ao Castelo, en Vimianzo, e coñecemos as historias de artesás e artesáns que adoitan percorrer as feiras e gozar co recoñecemento do seu traballo feito á man.

    VINTE na rúa

    Coa colaboración de

  • Exército Mekemeke. Coa neurona chamuscada

    Os mekemekes chegan ao micro arrastrando os pés, co cerebro medio fundido e o ánimo xusto para respirar. Gravado baixo mínimos vitais, falamos do que puidemos, como puidemos e ata onde nos deu a neurona. Hai momentos de lucidez intermitente, risiñas nerviosas, divagacións sen rumbo e cata de pasta de dentes caduca.

     Se algunha vez te sentiches tan canso que falabas coma un zombi e pensabas coma un cactus, este é o teu episodio. Grazallas por escoitar, por comprender e por rir connosco, mesmo cando estamos a punto de quedarmos durmidos.

    Advertencia: consumir preferentemente antes de ir para a cama. 

    Exército Mekemeke

  • Lúa Mosquetera: "Antes ser antifascista era un consenso social"

    Quen queira ver a Lúa Mosquetera en directo nun recital ten que anotar a data do 11 de xullo no seu calendario porque está a piques de baixar dos escenarios por un tempo. A causa é boa e vai da man da maternidade, como tantos dos seus poemas. Con ela falamos desa transición de filla a nai e de todo o que trae consigo nestes tempos

  • Exército Mekemeke. Empadroarse na Mariña con Grande Amore

    Se para ti naide de ninguén, este programa está pensado para ti. Repasamos con Grande Amore os seus recordos das verbenas, así como as súas favoritas. Para despois viaxar ata Frexulfe. Sabémolo, parece que ten nome de vida alemá, mais o certo é que é unha parroquia do Valadouro. 

    Poñemos a proba o mariñán que é Nuno reparando palabras e expresións que se din dende Viveiro ata Ribadeo. Claramente un programa pensado para a boa xente da Mariña.

    Exército Mekemeke

  • Margó Gayoso, tocadora e mestra de pandeireta e canto "Ser de aldea e tocar a pandeireta é un orgullo”

    Primeiro foi o baile, con apenas cinco anos, no cole como actividade extraescolar. Despois chegaría a gaita, o acordeón, a pandeireta, a percusión doméstica coas cunchas, tixolas, sachos ou latas de pemento … e o canto, claro, porque todo está relacionado. Nesta nova entrega do Vinte na rúa coñecemos a Margó Gayoso, unha rapaza de Saiáns (parroquia de Vigo con moita entidade de seu) e unha recoñecida tocadora e mestra de pandeireta e canto.

    Hoxe en día mantén a súa actividade como docente en Saiáns, mais tamén imparte aulas no Fiadeiro de Vigo, en Moaña ou en Coruxo, onde tamén forma parte do histórico grupo de pandeireteiras A Buxaina. A súa traxectoria inclúe tres discos gravados coas Tanxedoras e numerosas recollidas para se formar e poder ensinar a música tradicional galega con toda a súa riqueza e espontaneidade.

    VINTE na rúa

    Coa colaboración de

  • Exército Mekemeke. As oposicións

    Se che soa a palabra “temario” e tes máis subliñadores que plans de futuro, este episodio é para ti. Os mekemekes lánzanse ás oposicións sen drama, sen consellos e por suposto, sen estudar. Frases míticas, rutinas imposibles, comentarios familiares que non axudan e todas esas cousas absurdas que facemos para non abrir o tema 23. 

    Un espazo para rirnos un pouco desa carreira de fondo onde ninguén corre, pero todo o mundo suda.

    Exército Mekemeke

  • Entrevista | Iván Castiñeiras: “A película é unha oda á xente do rural, a eses deuses que resisten como as pedras”

    Un recoñemento inesperado. Así cualifica Iván Castiñeiras o que está a acontecer con Deuses de Pedra, a súa primeira longametraxe como director. Trátase dunha “película pequena feita con moito cariño”, segundo el mesmo indica, onde empregou material gravado ao longo de quince anos e está a percorrer festivais internacionais con varios premios xa acadados. Un éxito inesperado, mais non inmerecido para un proxecto de gran beleza que homenaxea as súas terras da infancia, na frontera entre Galicia e Portugal; e, sobre todo, recoñece a súa veciñanza, eses "deuses de pedra" que resisten alí, aínda que cada vez sexa máis difícil manterse en pé.

    Cinema

  • Que está a pasar nas cociñas do Lugo central?

    A Terra Chá e as comarcas limítrofes non están á marxe das mesmas dinámicas que vimos identificando no conxunto de Galicia. Hai peculiaridades, iso si, que as modulan e que as adaptan ao lugar. A primeira desas características diferenciais é o marcado elemento rural. Se este está presente e boa parte das comarcas galegas, aquí, cunha única poboación que supera os 10.000 habitantes -Vilalba- e somentes outra -Guitiriz- que pase por pouco dos 5.000 a súa influencia é definitiva. 

    Por iso non sorprende que algúns dos proxectos nos que está a haber unha renovación estean intimamente ligados ao ámbito agrogandeiro ou ao sector produtivo. É o caso do mundo da queixería, onde o recambio xeracional está a traer unha modernización dos procesos, en moitos casos, pero tamén un recoñecemento importante. 

    Gastronomía

  • Exército Mekemeke. Imos ao supermercado

    Aventurámonos nun dos ecosistemas máis perigosos da vida moderna: o supermercado. Dende o ninja dos conxelados ata o mítico velocirraptor da caixa rápida, analizamos as tribos que habitan entre carros, iogures e ofertas 3x2. 

    Risos, test absurdo e algunha queixa pasivo-agresiva incluídas. Colle o carriño… e prepárate!

Faite de vinte

A partir de 5€ mensuais podes suscribirte a VINTE e colaborar para que sigamos a producir contidos de calidade pagando dignamente as colaboracións de vídeo, fotografía, ilustración, xornalismo e creación de todo tipo.
Quero ser de Vinte