A Regueifa Plataforma viaxou ata Lousame para chantar as súas cámaras e micrófonos na antiga fábrica de papel de Fontán, fundada a comezos do século XIX polo tío de Domingo Fontán, e rexistrar a sesión de Minguante. Nunhas ruínas máis axeitadas para os ecos dos trasnos e as bruxas que de Neil Young o dúo formado polo escritor Miguel Alonso e Óscar Martínez debullou catro temas do seu primeiro disco longo, "A incrible historia dos homes minguantes", publicado o pasado ano. 

Desta volta as cámaras d'A Regueifa Plataforma viaxaron ata A Estrada para filmar a Loita Amada, o proxecto liderado por Pablo Carracedo Jasper (Xenreira, Nao, A Matraca Perversa...) e Nébeda Piñeiro (Cantometrics) que comezou a súa andaina a finais do pasado ano. A carón da lareira familiar ecoou na pedra "Un anaco de min", unha das pezas máis emocionantes do seu primeiro disco, e unha moi persoal adaptación dunha das gravacións que fixo Alan Lomax no país hai setenta anos e levada, coma non podía ser doutro xeito a coordenadas revolucionarias. Loita Amada atópase agora mesmo a preparar o que será o seu segundo disco, un traballo que gravarán en terras vascas con Kaki Arkarazo aos controis e que verá a luz en 2024.

Desta volta as cámaras d'A Regueifa Plataforma viaxaron até Catoira para filmar a rachadora proposta electrónica de Músculo! manufacturada ao vivo. Facendo honor ao concepto detrás do seu novo disco, o propio Ulla, decidiron chantar na ribeira do río os seus sintetizadores, samplers e caixas de ritmos para esluír a paisaxe fluvial nas súas propias paisaxes electrónicas. Unha sesión para recordar onde os baixoulláns construíron unhas músicas ("As penas", "#anti#go" e "Ulla") que transformaron unha antiga fábrica de tixolos na perfecta pista de baile improvisada.

Undécima entrega das Miudiño Sessions, desta volta con Su Garrido Pombo, que vén de lanzar 'Patios de Luz', o seu segundo disco en solitario. Unhas músicas que precisaban un contexto e un espazo tan especial coma a luminosa terraza olívica que xenerosamente nos cedeu esa lenda viva do indie que é Marco Maril, produtor ademais do album. Arrodeadxs de roupa pendurada e coas Illas Cíes no horizonte fomos testemuña privilexiada dos feitizos polifónicos que a meiga de Fornelos de Montes é quen de cociñar no seu looper coa súa voz, percusión e guitarras coma únicos ingredientes. Cando o talento é sobrenatural, a maxia pode abrollar mesmo nun espazo tan cotián coma un patio de luz.