Este venres, 8 de marzo, a rapazada dos anos 90 está de loito xa que se deu a coñecer a morte do creador dos primeiros ídolos da infancia: Son Goku e Arale.
En realidade, o debuxante Akira Toriyama finou o pasado 1 de marzo, debido a un derrame cerebral con 68 anos, mais non foi ata este Día Mundial da Muller Traballadora que coñecemos a noticia. E as mostras de pésame entre as galegas e os galegos non se fixeron esperar a través das redes sociais.
Ver “As bólas máxicas” na TVG cada tarde era toda unha relixión e unha cita dificilmente reemprazable para toda unha xeración de rapaces e rapazas que ficaban abraiados con estes novos formatos na televisión.
O manga chegou en galego ás teles do noso país. Así foi como escoitamos por estas terras a Son Goku, Arale ou ao doutor Slump sen saber que, seguramente, estabamos a asistir ás máis eficaces clases de galego da nosa vida. Foi a gran normalización do idioma. E, por certo, o protagonista era Son Goku, non Goku, como posteriormente o sentiamos chamar nalgunha canle estatal.
Eran os tempos do Xabarín. Outros tempos. “Aínda hoxe me atopo con adultos que lembran con moito agarimo a súa época de rapaces, cando ir ver o Xabarín era case unha relixión”, explicaba nunha entrevista a Praza.gal Antón Rubal, un dos dobradores de Son Goku. Rubal aseguraba entón estar «moi orgulloso» porque o Xabarín era en galego e moitos deles incorporáronse ao idioma vendo ese programa. «Naquela época moitos mozos de contornas urbanas que eran castelán falantes achegáronse ao galego grazas ao Xabarín», dicía o actor e director de dobraxe.
Ao coñeceren a noticia do pasamento do mestre Toryama sucedéronse na rede os recoñecementos para o artista e mesmo houbo quen o propuxo xa para a Medalla Castelao ou o Día das Letras Galegas.
