VINTE adianta en exclusiva o videoclip da nova canción da banda Zeltia Irevire,  "As Mouras". O traballo audiovisual foi filmado nas paraxes naturais do Courel. Neste tema o trío formado Zeltia Acuña (compositora da canción), Miguel Carballido Cernadas e Cibrán Seixo Pazos mestura folk acústico con texturas electrónicas suaves, creando unha atmosfera íntima con moita forza e sensibilidade. 

A canción naceu tras os incendios forestais do 2022 que afectaron e puxeron en perigo a moitas aldeas do Courel e a un dos bosques autóctonos máis antigos de Galicia, a Devesa de Rogueira. A letra, segundo explican desde a banda, é unha reflexión introspectiva sobre como o noso xeito de vida fainos non escoitar e pasar por alto a fraxilidade da paisaxe e a necesidade de protexela. Reivindica a figura das “Mouras” como as gardiáns dos bosques e como guías espirituais daquelas persoas que defenden a terra. Foi rodada na contorna da aldea de Vilamor, a Cova da Moura, a fervenza do Rexio e o Val das Mouras, entre outras localizacións.

As Mouras son espíritos femininos fortes que, segundo a tradición, habitan os ríos, os montes e os penedos. A canción fálanos dun territorio onde a natureza, a memoria e o mito conviven, cun videoclip asinado por Bruno Pierucci onde destaca a interpretación das profesionais de danza contemporánea Ari Vázquez e Skío Carral.